Աննա Մանասյան
«Շանթ» հեռուստաընկերության գլխավոր գործառնական տնօրեն
Աննա Մանասյանը 2023 թվականի սեպտեմբերից զբաղեցնում է «Շանթ» հեռուստաընկերության գլխավոր գործառնական տնօրենի պաշտոնը՝ ղեկավարելով ընկերության ընթացիկ գործունեությունը, ապահովելով գործընթացների արդյունավետ կազմակերպումն ու որոշումների իրականացումը։ Կրթությամբ միջազգային իրավունքի մագիստրոս է և ունի ավելի քան 17 տարվա մասնագիտական փորձ իրավական, պաշտպանական և մեդիա ոլորտներում։
Իր կարիերայի ընթացքում ծառայել է ՀՀ զինված ուժերում՝ զբաղեցնելով անձնակազմի կառավարման, իրավական ապահովման և վերլուծական գործունեության հետ կապված պատասխանատու պաշտոններ։ Մինչ ղեկավարության կազմում ընդգրկվելը, իրավական գործունեություն է ծավալել հեռուստաընկերությունում ՝ մասնագիտանալով կորպորատիվ իրավունքի, պայմանագրային հարաբերությունների և կազմակերպության իրավական ապահովման ոլորտներում։ Իր մասնագիտական փորձի շնորհիվ Աննա Մանասյանը հաջողությամբ համադրում է իրավական գիտելիքներն ու կառավարման հմտությունները՝ նպաստելով «Շանթ» հեռուստաընկերության կայուն զարգացմանն ու արդյունավետ գործունեությանը։
Մարգարիտա Գրիգորյան
Մարգարիտա Գրիգորյանը մեդիա ոլորտի առաջատար գործիչներից է, ում մասնագիտական գործունեությունը ընդգրկում է ավելի քան 30 տարի՝ հեռուստատեսության, ռադիոյի, տպագիր մամուլի, պետական կառավարման և կրթության ոլորտներում։ Նա լայնորեն ճանաչված է Հայաստանի ժամանակակից մեդիա դաշտի ձևավորման և զարգացման գործում ունեցած նշանակալի ներդրման համար՝ համադրելով խմբագրական փորձը, ռազմավարական մտածողությունն ու ակադեմիական գիտելիքը։ Մարգարիտա Գրիգորյանը լրագրողական գործունեությունը սկսել է 1990-ականների սկզբին՝ դեռ ուսանողական տարիներին համագործակցելով հայկական առաջատար թերթերի և «Արմենպրես» լրատվական գործակալության հետ։ 1993 թվականին նա աշխատանքի է անցել Հայաստանի Հանրային ռադիոյում, որտեղ զբաղեցրել է խմբագրի, ապա՝ պրոդյուսերի և սոցիալ-քաղաքական հաղորդումների գլխավոր խմբագրի պաշտոններ։ Նրա վաղ շրջանի աշխատանքները կենտրոնացած էին հասարակական և քաղաքական թեմաների լուսաբանման վրա՝ Հայաստանի անկախացումից հետո ձևավորվող մեդիա միջավայրում։
